Alaska import niangkon nga maglisud

CEBU, Philippines — Mismo ang kanhi champion import nga si Diamon Simpson ang miingon nga usa ka tungason nga dalan ilang giatubang sa ilang serye batok San Miguel Beermen.

Si Simpson mirehistro og double-double nga 31 puntos ug 24 ka rebounds, apan dili kini igo aron ihatud ang Aces sa kadaugan sa Game 1 niadtong Sabado.

Ang No.2 seed nga Alaska napuno sa suliran tungod kay gawas ni Calvin Abueva nga gisuspenso, wala usab kaduwa ang Fil-American scorer nga si Chris Banchero kinsa adunay giatubang nga suliran sa pamilya.

Human sa ilang 79-92 nga kapildehan, si Simpson miingon nga kinahanglan nga maperpekto nila ang ilang game plan aron mahimo nila ang ilang misyon nga pagpalagpot sa defending champion nga San Miguel.

Ang Alaska maningkamot nga matabla ang serye karong gabii sa Game 2 didto sa Smart Araneta Coliseum.

Si Aces coach Alex Compton nagkanayon nga kinahanglan nila ang usa ka solidong depensa aron dili na mausab ang nahitabo sa Game 1 diin sobra sa lima ka Beermen ang mirehistro og double-figures sa scoring. (BANAT NEWS)