Sorongon, Lee misutoy Megawear Half Marathon
CEBU, Philippines — Ang beterana nga si Ruffa Sorongon ug si Prince Joey Lee maoy migawas nga labing paspas sa tagsa-tagsa nila ka dibisyon sa Megawear Half Marathon kagahapon sa buntag didto sa SM City Cebu grounds.
Si Sorongon mitapos sa lumba sud sa usa ka oras, 30 minutos ug 28 segundos aron masakmit ang korona sa women's division, gisundan ni Evamie Villarin sa ikaduhang dapit sa oras nga 1:36:03, samtang si Rue Reinhardt Panibon misakmit sa ikatulo sa oras nga 1:39:43.
Sa iyang bahin, si Lee sa Spectrum Runners, milabang sa finish line sud sa usa ka oras, 16 minutos ug 16 segundos aron harian ang men's open ug sa susamang paagi mapilde ang Kenyan nga si Eric Chepsiror kinsa adunay oras nga 1:19:39. Third placer mao si Paul James Zafico sa oras nga 1:20:16.
Sa 10K category, ang Kenyan nga si Eliud Kering ug si Melody Perez midaog sa tagsa-tagsa nila ka dibisyon.
Misutoy si Kering sa unang dapit sa oras nga 33:15. Nagsunod si Joseph Arner Emia (34:31) ug Ariel Saballa (34:44) sa ikaduha ug ikatulong luna.
Sa iyang bahin, si Perez maoy paspas sa women's side sa oras nga 41:23 batok nila ni Joan Alinsunod (42:05) ug Cherry Andrin (44:31) sa ikaduha ug ikatulong luna.
Ang top three winners sa 5K mao sila si Karen Andrea Manayon (19:37), Lourence Yvory Garcia (20:32) ug Moira Erediano (21:36) sa womens, samtang sila si Dwight Galolo (17:28), Herbert Helarcosa (17:32) ug Marl Adrian Baguio (17:39) maoy mens winners. (BANAT NEWS)
- Latest
