CCT Builders milansang ikaunom nilang daog sa Celba

CEBU, Philippines – Ang CCT Builders miugbok sa ilang ikaunom nga kadaogan pinaagi sa pagpilde sa Krizia RM-EM Delivery Solutions aron pabiling magsolo sa ikaduhang dapit sa standing sa Cebu Legends Basketball Association (CELBA) Season 3 basketball tournament niadtong Miyerkules  sa gabii didto sa Canduman Housing gym, dakbayan sa Mandaue.

Dili tiaw ang kadaogan sa CCT Builders ni Engr. Chucho Tan kay ilang gilubong ang Krizia ni Arthur Lelis sa iskor nga 93-74.

Suportado sab nilang Dr. Jun Borces, Roy Ermac, Eboy Quiñahan, Genemar Cena ug Nelson Solana, ang CCT Builders nga aduna na karo'y 6-2 nga baraha gipangulohan ni Richard Madrid nga milansang og 20 puntos, gisundan ni Francis Palero nga midukdok og 17 puntos.

Sila si Ermac ug Borces nagtampohay og 12 puntos sa CCT Builders, kansang duwa wala gyud mobahar gikan sa pagsugod hangtod sa katapusang pitik sa oras.

Miariya unta og 23 puntos si Rowen Padayogdog, apan nakawang lang ang iyang paningkamot kay napukan ang Krizia nga maoy iyang giduwaan.

Mihakot sab og 12 puntos si Roland Alilin alang sa 4-4 nga Krizia.

Labaw og 10 puntos ang CCT Builders sa third period, 43-33, apan mi-rally ang Krizia hinungdan nga nakan-an ang labaw ngadto na lang sa 60-55 human sa maong kuwarter. Dali hinuon nainat sa CCT Builders ang ilang labaw ug samtang nagkagamay ang oras, nagkadako sab ang labaw.

Sa laing duwa, ang Monterroyo midaog sab batok sa VFL sa iskor nga 69-61.

Nagkumboya'g 22 puntos sila si Clark Monsanto ug Alexam Amaga sa Monterroyo nga nakarekober human mabiyai og siyete puntos sa first quarter sa iskor nga 12-19.

Si Monsanto mipupo og 12 puntos, samtang si Amaga misakupo og 10 puntos sa team ni Dr. Raul Monterroyo.

Ang VFL ni Jerome Villaflores gipangulohan sab ni Timmy Cabrera nga mibagnos og 19 puntos.

Ang liga ubos sa superbisyon      nilang    S/Insp. Dondon Coloscos ug Gilbert Lesin sa abag nilang Willy Medillo, Richard Limosnero, Wendel Oquias ug Roel Tayag.

PUNTOS MATAG USA

Unang duwa:

MONTERROYO (69) – Monsanto 12, Amaga 10, Estremos 8, Ecot 8, Tañan 6, Jacalan 6, W. Landiza 6, Mendoza 6, J. Landiza 4, Sugay 2, Alvarez 1.

VFL (61) – Cabrera 19, Cañas 10, Gemongala 8, Cabarles 8, Destrouse 5, Villaflores 3, Alabat 2, Seno 2, May 2, Prieto 2.

Ikaduhang duwa:

CCT Builders (91) – Madrid 20, Palero 17, Ermac 12, Borces 12, Flores 6, Cena 6, Ouano 6, Bucabal 4, J. Flores 4, Beldera 2, Goc-ong 2.

KRIZIA (74) – Padayogdog 23, Alilin 12, Cuizon 8, Oquias 7, Miñoza 6, T. Herbieto 6, Sayson 5, B. Herbieto 5, Lelis 2.