Tapuson na elim sa Partner's Cup

CEBU, Philippines – Suwayan sa University of the Visayas (UV) Baby Lancers nga himuong pormal ang ilang pagtikang sa juniors division finals sa dihang ilang harungon ang wala pa'y daog nga Cebu Institute of Technology-University (CIT-U) Wildkittens pagtapos sa eliminasyon sa 2018 Cebu Schools Athletic Foundation, Inc. (CESAFI) Partner's Cup karong adlawa diha sa Cebu Coliseum

Ang Baby Lancers ug Wildkittens magtige sa alas-5:15 sa hapon  sa dili pa ang CIT Wildcats ug Southwestern University (SWU)-Phinma Cobras magbangga sa ilang non-bearing game sa alas- 6:45 sa gabii.

Bitbit ang 4-1 nga baraha, ang Baby Lancers segurado nang sud sa kampiyonato bisan pa man og unsay resulta sa ilang duwa batok sa Wildkittens.

Ilang sangkaon ang Organique California-University of Southern Philippines Foundation (USPF) Baby Panthers sa 'best-of-three' title series sugod karong Domingo.

Sa collegiate level, ang two-time CESAFI defending champion UV Green Lancers ug ang M. Lhuillier Kwarta Padala-University of Cebu (UC) Webmasters maoy mag-ilog sa korona sa usa gihapon ka best-of-three series.