Baby Lancers sud sa finals
CEBU, Philippines – Si Gabriel George Cometa mitagak og 12 sa iyang 32 puntos sa init nga rally sa katapusang kuwarter ug si Albert Sacayan midugang og 21 puntos sa dihang gipalagpot sa University of the Visayas (UV) Baby Lancers ang Hotel Fortuna-University of Cebu (UC) Junior Webmasters, 101-90 aron pag-angkon sa katapusang luna sa finals sa 2018 Cebu Schools Athletic Foundation, Inc. (CESAFI) Partner's Cup kagabii diha sa Cebu Coliseum.
Ang manglayatay nga mga forward nga sila si Joshua Yerro ug Mar Leandro Actub nagkumboya'g 29 puntos alang sa Baby Lancers nga maoy makigtige sa Organique California-University of Southern Philippines Foundation (USPF) Baby Panthers sa 'best-of-three' finals nga sugdan karong Domingo.
Ang Baby Lancers duna pa'y nahibiling usa ka duwa sa eliminasyon batok sa wala pa'y daog nga Institute of Technology-University (CIT-U) Wildkittens karong Sabado, apan segurado na silang sud sa kampiyonato bitbit ang 4-1 win-loss record.
Nakapanimaho na unta og daog ang Junior Webmasters human sila naglabaw og otso puntos sa nahibiling sayes minutos sa duwa, 85-77. Apan sukad niadto, singko puntos ra ilang nahimo.
Luyo sa mainit nga mga kamot nilang Cometa, Yerro ug Sacayan, ang Baby Lancers mipabuto og 21-2 nga bomba aron pagbuak sa duwa pabor kanila, 98-87 sa katapusang 1:05 sa aksiyon.
Sa kinatibuk-an, gilampaso sa Baby Lancers ang Junior Webmasters sa katapusang kuwarter, 31-13.
Si Jasper Pacana maoy nangu sa Junior Webmasters uban ang 21 puntos.
- Latest
