AC Troopers mitiklo sa Sniper sa Triple-A basketball

CEBU, Philippines – Ang AC Troopers mipuhag sa Sniper, 59-55 sa ilang gubat sa round robin semifinals sa Triple-A President's Cup 2018  basketball tournament niadtong Domingo didto sa Kimwa gym sa Subangdaku, dakbayan sa Mandaue.

Sa sayo pa, ang D' Lurics Enterprises nakakuha sab og bentaha human midaog batok sa Explorer, 50-40  nga maoy labing ubos nga iskor karong ligaha.

Wala magdahom ang AC Troopers nga modaog kay gagmay sila itandi sa Sniper, apan ang ilang kaisog maoy migahom sa ilang kadaogan.

Mikumbati og maayo alang sa AC Troopers ni S/Insp. Dondon Coloscos mao si Raul Mahusay nga mipaarak og 12 puntos, diin 10 niini iyang nahimo sud lang sa first period aron hatagan ang koponan og 18-15 nga bentaha human sa maong kuwarter.

Ang AC Troopers nga temporaryong gidumala ni coach Jason Pestaño nakakuha sab og igong suporta gikan ni Ariel Ocier nga mitusak og 11 puntos ug ingon man ni Noel Ferolino nga mikadlit og 10 puntos, lakip na ang krusyal nga 3-pointer pagsugod sa fourth quarter nga nakapalabaw og balik sa AC Troopers, 42-40. Si Ferolino miposa pa og laing tres alang sa ilang 47-42 nga labaw.

Bugtong ang team manager nga si Gilbert Lesin lang ang miiskor og double figures sa Sniper nga mitira og 10 puntos.

Sa laing bahin, si Canjo Echavez mitali og 10 puntos aron pangulohan ang D' Lurics Enterprises ni ballclub vice president Dodong Lurica.

Mangtas kaayo ang D' Lurics diin miposte sila og 31-13 nga bentaha sa third period, apan nahilis kini ngadto na lang sa usa ka lugas, 37-36. Dali hinuon nainat ang labaw dihang gitirahan kini og tres ni Geryl Bukiron, 40-36  human sa maong kuwarter.

Gawas nga nagpusot-pusot nilang opensiba, hugot sab kaayo ang depensa sa D' Lurics diin ila lang gipaiskor og kuwatro puntos ang Explorer sa tibuok fourth period.

Ang liga nahimo pinaagi sa paningkamot  sa presidente niining si Alan Buenavista. Ang mga duwa gipadagan ni league commissioner Geryl Bukiron sa abag nilang Orly Navarro ug Ramil Baclay.

PUNTOS MATAG USA

Unang duwa:

D' LURICS (50) – Canjo 10, Arceo 9, Cuerbo 8, Bukiron 6, Cuda 6, Yu 5, Yatan 4, Manatad 2.

EXPLORER (40) – Suson 7, Buenavista 6, Gorgonio 6, Nova 4, Estremos 4, Bamba 4, Garcia 4, Ouano 2, Baclay 2, Apet 1.

Ikaduhang duwa:

AC TROOPERS (59) – Mahusay 12, Ocier 11, Ferolino 10, Yares 6, Englis 5, Acusar 4, Ecot 3, Oquias 2, Pestaño 2, Romagos 2, Limosnero 2.

SNIPER (55) – Lesin 10, Sicad 9, Budiongan 8, Quijano 6, Banate 6, Amaga 5, Bucabal 4, Retiza 2, P. Armamento 2, Soco 2, Montalban 1.