Cute nga panimalos sa ex

CEBU, Philippines — Ang gugma mura ra na og bagyo — nag uros-uros karon  pero ugma wala na.  Pila ka mga adlaw makalimot na ka ug ma-in love na pod ka sa laing nilalang.....(ayeeehh kilig noh?)

Pero naa gyu’y  uban nga atong mga ex bf/gf nga dili nato malimtan  tungod kay grabe kasakit ang  iyang nabuhat kanato.

Mao nga makahuna- huna ta og panimalos  tungod sa atong kalagot.

Apan huna-hunaa, dili sulbad ang bayolente nga panimalos.  Seguro matawag kini og sweet o cute revenge, diin ikaw magmalipayon sa imong kinabuhi ug imong ipakita nga wala na’y luna diha kanimo ang imong ex. Ug ang labing importante nga naka-move on na ka.

Klarohon nako, lain-lain ang rason sa breakup. Busa kini akong tips alang ra gyud kini sa mga tawong gibinuangan sa ilang ex kaniadto nga dili na gusto mailad pa og balik. Duna’y mga higayon nga  magmahay ang imong ex nga namiya og kalit kanimo.

Aniang pipila ka tips alang sa sweet o cute revenge:

1. Mag-gym ug mag-ehersisyo aron molami ang imong lawas. Kon molutaw ang pamorma sa imong lawas, mo- blooming sad ka tan-awon.  Igo na lang sa pag-like  ang mabuhat sa imong  ex sa mga hulagway nimo sa Facebook.

2.Maabot ang panahon nga makauyab ka og lain.  Dili  angay ikaulaw nga ipakita nimo kon unsa ka ka-happy  sa bag-o nimong relasyon.   Makaingon ang imong ex , nga magmalipayon ra diay gihapon ka bisan wala na ka sa iyang kiliran.

3. Tungod kay naka-move on na man ka, mahimo ra gyud ka motubag kon mo-text o motawag siya kanimo.  Kon duna siya’y importante nga tuyo, tubagon og tarong.  Apan kon wala’y kapuslanan ang iyang pag-communicate kanimo, ipakita nga dili na ka interesado kaniya.

4. Apan kon gusto jud ka nga dili mahasol, puwede ra gyud nimo siya i-block sa Facebook.

5. Importante nga naa mo’y space sa usag-usa aron dili  na ka matunto og balik kaniya.

(Madungog si Inday Torotot  sa Yes! The Best 91.5  sa programang  LDR, Lunes- Biyernes, 7-11pm)