Dragons nakaikyas

CEBU, Philippines – Ang Cebu Eastern College (CEC) Dragons nakabawi human mapapas ang 17 puntos nilang labaw ug dayon nagsandig sa pagkamabayanihon nilang Ivan Ares ug Keith Soco aron pakgangon ang Mandaue Hotel-University of San Carlos (USC) Baby Warriors, 71-68 alang sa labing una nilang daog sa 2018 Cebu Schools Athletic Foundation, Inc. (CESAFI) Partner's Cup kagabii diha sa Cebu Coliseum.

Mibugwak dayon og nagkayong opensa ang Dragons pagsugod sa duwa nga ilang giablihan pinaagi sa 10-2 run. Misamot pa ang kainit sa Dragons hinungdan nga miabante pa og 17 puntos, 44-27.

Apan ang Baby Warrios hinay-hinay nga migukod hangtod nga nakasikit sila ngadto na lang sa dos puntos, 50-52.

Misamot pa og kalagsik ang Baby Warriors human na-ejected ang usa sa mga sinaligan sa CEC nga si Nick Galope gumikan sa pagsukmag niini ni Justin Atilano sa USC sa nahibiling 34 segundos sa ikatulong kuwarter. 

Bayente kuwarto segundos ang milabay, ang assistant coach sa CEC nga si Mark Tallo na sab ang gipalayas sa korte human matawgi og sunod-sunod nga technical gumikan sa   pagkomprontasi ni reperi Gilbert Rosal.

Tuod man, mipabor ang huros sa hangin sa duwa ngadto sa Baby Warriors nga nakalabaw sa unang higayon, 63-62  sa katapusang sayes minutos sa init kaayo nga aksiyon.

Human nagtabla ang iskor nga 64-64, ang Dragons milusad og 5-2 run aron paglabaw og balik, 69-66  sa nahibiling 1:17.

Ang Baby Warriors duna pa unta'y tsansa nga makapuwersa og overtime apan nakawang ang tanan human mikagar ang sunod-sunod nilang tira gikan sa 3-point area.

Si Ares mitapos uban ang 16 puntos, si N. Galape dunay 12 puntos, samtang sila  si Karl Tiu ug Rauic Panimdim nagkumboya'g 21 puntos alang sa Dragons nga miputol sa duha ka sagunson nilang pilde. Samtang ang Baby Warriors nasugamak sa ikatulo nilang sunod-sunod nga kaparotan.