Robertson hataga'g lifetime achievement award

CEBU, Philippines – Si Hall of Famer Oscar Robertson pasidunggan sa NBA pinaagi sa pagtunol niini og Lifetime Achievement Award sa NBA Awards karong Hunyo 26. 

Sa maong kalihukan, ipahibalo sab kun kinsa'y MVP ug uban pang mga individual awardees sa miaging season. 

Si Robertson nga maoy career leader uban ang 181 ka triple doubles ug maoy unang player nga mi-average og triple- double tibuok season, maoy Rookie of the Year sa NBA niadtong 1961, MVP niadtong 1964 ug nakadaog og kampiyonato sa Milwaukee niadtong 1971. 

Ang kilas nga guwardiya naapil siyam ka higayon sa All-NBA first team ug gibotohan isip usa sa 50 ka labing ngilngig nga players sa kasaysayan sa liga.

Nahimo sab siyang co-captain sa 1960 U.S. team nga mibira og bulawang medalya sa Olympics.

Si Robertson nagsilbe sab nga presidente sa National Basketball Players Association niadtong 1965-1974 ug ang iyang Oscar Robertson Rule maoy nagpakatawo sa free agency sa liga.