Baby Panthers 3-0 na

CEBU, Philippines – Gilat-an sa Organique California-University of Southern Philippines Foundation (USPF) Baby Panthers ang Cebu Institute of Technology-University (CIT-U) Wildkittens, 83-41  alang sa ikatulo nilang sagunson nga daog sa 2018 Cebu Schools Athletic Foundation, Inc. (CESAFI) Partner's Cup kagahapon diha sa Cebu Coliseum.

Gipangulohan nilang Sean Punzalan ug Neon Chavez ang kadaogan nga adunay 10 puntos matag usa, ang tanang players nga gipasud ni USPF coach Alan Cabatingan nakaiskor aron tabangan ang Baby Panthers nga angkonon ang solong liderato sa juniors division bitbit ang 3-0 nga baraha.

Naglabaw gikan sa pagsugod, klaro na kaayo ang resulta human ang Baby Panthers miposte og 30 puntos nga labaw, 55-25 sa himalatyong segundos sa ikatulong kuwarter.

Ang Baby Panthers mitagak pa og dugang 28 puntos sa katapusang kuwarter aron pagtali og 42 puntos nga demolisyon.

Sa sayo pa, si Gabriel Cometa mibahog og 21 puntos ug si Andro Actub midugang og 17 puntos sa dihang gilubong sab sa University of the Visayas (UV) Baby Lancers  ang Mandaue Hotel-University of San Carlos (USC) Baby Warriors, 88-69 alang sa una nilang daog sud sa duha ka duwa.

  Sila si Joshua Yerro ug Albert Sacayan nagkumboya'g 21 puntos alang sa Baby Lancers  nga milusad og nagkayong opensiba  aron pagposte og 19 puntos nga labaw, 71-52  nga nakapabarag sa Baby Warriors sa katapusang 12 minutos sa duwa.