Baby Warriors midaog na sab
CEBU, Philippines — Si Allan Ruiz milansang og hagpok nga tres sa katapusang 33 segundos sa duwa aron pag-aswat sa Mandaue Hotel-Univesity of San Carlos (USC) Baby Warriors ngadto sa makutas nga 60-56 nga daog batok sa Active Casino-University of San Jose-Recoletos (USJ-R) Baby Jaguars sa 2018 Cebu Schools Athletic Foundation, Inc. ( CESAFI) Partner's Cup kagahapon sa Cebu Coliseum.
Sikit kaayo ang engkuwentro sa duha ka koponan nga miresulta ngadto sa pipila ka panagtabla sa hinapos nga bahin sa aksiyon. Ang katapusan sa iskor nga 55-55 human sa free throw ni Kenneth Malazarte sa Baby Warriors sa nahibiling 40.5 segundos.
Pito ka segundos ang milabay, si Ruiz miposa og krusyal nga tres nga maoy nahimong yawi sa Baby Warriors ngadto sa kalampusan.
Sa sunod nga posisyon, nailog sa Baby Warriors ang bola nga miresulta ngadto sa yanong itsa ni Karl Cabulao nga nagsilyo sa kadaogan sa USC, 60-55 sa nahibiling 20 segundos.
Si Ruiz mitapos uban ang 17 puntos, samtang sila si Cahchin Tagalog ug Willy Allosada nagkumboya'g 21 puntos alang sa Baby Warriors nga temporaryo karong nagkupot sa liderato bitbit ang 2-0 record.
Ang pilderong Baby Jaguars gipangulohan ni Kevin Guibao nga mitangag og 21 puntos.
- Latest
