Crawford mikulata ni Horn

CEBU, Philippines — Taliwala sa pagarpar ni Jeff Horn, nagpabiling hilom si Terence Crawford.

Buot diay ni Crawford nga ang iyang mga kumo na lang maoy iyang pasultion.

Si Crawford mikuha dayon og atensiyon sa labing una niyang away sa welterweight division human niyang gidominar ug dayon gipayaka si Horn sa ikasiyam nga hugna aron pagsakmit sa ikatulo niyang world title sa ikatulong dibisyon kagahapon didto sa MGM Grand Garden Arena sa Las Vegas, Nevada.

Gikulata ni Craword si Horn gikan sa pagsugod hangtud sa takna diin iyang gipasurender ang kanhi way pildeng Australyano nga nakampiyon human gibuntog si Manny Pacquiao dul-an usa ka tuig na ang milabay didto sa yuta niyang natawhan sa Brisbane, Australia.

Makita ang kumpletong dominasyon sa statistika diin si Crawford mipatugpa og 155 sa 367 niya ka mga suntok samtang si Horn nakaigo lamang og 58 sa 257 niyang gilabay nga mga kumo.

Bisan  anggulo, wa gyud padaog si Horn nga gibatil og kulata ni Crawford.

Sa ikasiyam nga hugna, padayon ang bagsik nga opensiba ni Crawford hinungdan nga nalukapa ang nagkalipong-lipong nang Horn.

Nakabarog man tuod si Horn apan gidabo-dabo na sab kini og kastigo ni Crawford hinungdan nga naaghat si reperi Robert Byrd pag-undang sa away sa oras nga 2:33 aron paglikay ni Horn sa dugang kadaut.

Si Crawford mi-inat sa limpyo niyang record ngadto sa 33-0 nga gidayan-dayanan na karon og 24KOs,samtang si Horn nakatilaw sa labing una niining pilde sa 20 ka away uban ang 12K0s. — (BANAT NEWS)