Ala ngadtong magsayo: Tahura imong kontrata
CEBU, Philippines — Gipahimangnoan ni ALA Promotions President/CEO Michael P. Aldeguer ang wa'y pildeng featherweight prospect nga si Mark 'Magnifico' Magsayo nga tahuron ang kontrata niini uban kanila aron malikayan ang mga komplikasyon nga makadaut sa iyang karera sa boksing.
Giluwatan ni Aldeguer kining maong pamahayag human masayod sa taho ni Ryan Songalia sa RingTv.com nga si Magsayo, ang WBO No. 1 126-pound contender, mipirma og kontrata ni Malaysia-based manager Vikram Sivapragasam ug ang mo-promote sa iyang mga away mao na ang Now Boxing Promotions nga atua magbasi sa Las Vegas.
"It is just that my contract expired and for now I am taking serious consideration to achieve my dream of becoming world champion," matud pa ni Magsayo ngadto ni Songalia. Apan giklaro ni Aldeguer nga si Magsayo duna pa'y buhing upat ka tuig nga kontrata uban sa ALA Promotions ug ang bugtong kontrata nga napupos na mao ang managerial contract niadtong Hulyo sa miaging tuig.
"We expect Mark (Magsayo) to follow the promotional contract to avoid complications that could affect his boxing career," sumala pa ni Aldeguer.
Ang 22-anyos nga si Magsayo, usa sa labing hayag nga boksidor sa ALA Gym nga ma-world champion, wa'y pilde sa 18 ka away nga gidayan-dayanan og 13KOs.
Ang garbo sa dakbayan sa Tagbilaran mihaw-as gikan sa malampusong kampanya sa 2017 diin siya mikadlit og duha ka sagunson nga daog pinaagi sa knockout batok nilang Issa Nampepeche ug Daniel Diaz. Apan si Magsayo wala na makaaway pa sukad midaog pinaagi sa desisyon batok sa Hapon nga si Shota Hayashi niadtong Nobiyembre 25 sa miaging tuig didto sa yuta niyang natawhan.
- Latest
