Krusyal nga duwa

CEBU, Philippines – Sa pagtaak nila og balik sa ilang korte, krusyal nga duwa diin lagmit wala na'y ugma nga nagpaabot sa Cleveland Cavaliers kun sila mapilde.

Mao kini ang senaryo nga nag-atang sa Cavs sa ilang pag-host sa Golden State Warriors sa Game 3 sa 'best-of-seven' NBA Finals karong Huwebes didto sa Quicken Loans Arena sa Cleveland, Ohio.

Ang Cavs nasagunsonan og pilde sa Warriors sa nag-unang duha ka duwa sa serye mao nang andam silang makigpatay didto sa ilang tugkaran sa tinguha nga makabawi gumikan kay lisud na kun malubong pa sila og 3-0 batok sa gamhanang Warriors.

Napuno hinuon og pagsalig si Kevin Love nga nindot ang ilang duwa atubangan sa ilang mga dumadapig ug ila kining pahimuslan aron mapiog ang Warriors.

Mao sab kini ang panglantaw ni J.R. Smith. Gusto niya nga mobanat sila og maayo didto sa ilang nataran aron makab-ot nila ang gihandum nga daog.

Ang sentimento nilang Love ug Smith gidasonan ni LeBron James nga nagkanayon nga dili sila mahimong  morelaks bisan tuod og sila moduwa didto sa ilang teritoryo.

"We've played some really good basketball on our home floor. But that shouldn't give us any comfort. We should still be uncomfortable,"  matud pa ni James nga anaa karon sa ikawalo niyang sunod-sunod nga pagbutho sa NBA Finals.  

Si James ug iyang kaubanan angayan lamang maghinuklog niining tanan uban ang gamay'ng kabalaka gumikan kay sa kasaysayan sa NBA wala pa'y bisan usa ka koponan nga nabiyaan og 3-0 ang nakahimo og milagro aron modaog sa titulo.