RJ Store nagpabiling wa'y pilde sa 12th J&J Surplus
CEBU, Philippines – Miiskor na sab og daog ang RJ Store sa ilang duwa batok sa Pilapilan sa 12th J&J Surplus basketball tournament niadtong Martes didto sa GT Academy gym sa Tayud, Lilo-an.
Dili basta-basta ang kadaogan sa RJ Store kay ilang gilubong ang Pilapilan sa iskor nga 87-61.
Lima ka players ang miiskor og double figures sa RJ Store ubos sa pagpangu ni Walter Baring nga mipugnit og 15 puntos, gisundan ni Jay-R Yerro sa iyang 14 puntos.
Ang laing tulo mao sila si Joel Sayta, Michael Rojo ug Joel Brigoli nga nagkumboya'g 33 puntos sa RJ Store nga miabante og 14 puntos sa halftime.
Wala pa matagbaw, ila pa nga giinat ang labaw ngadto sa 68-39 sa wala pa ang 26 puntos nga demolisyon.
Sa maong kadaogan, ang RJ Store ni Jun Rayan Pepito nag-una na karon sa standing ubos sa bracket A uban sa E&F Surplus ni Fury Trazona sa managsama nilang 5-0 nga baraha.
Sa laing aksiyon, ang CCKMS nakaipsot sa ligas kaayo nilang duwa batok sa Union Galvasteel, 70-69.
Ang manager sa GT Northeast Academy School nga si Joe Laurito nga nagpauwan og 3-point shots maoy mituboy sa CCKMS ngadto sa kadaogan pinaagi sa iyang 11 puntos.
Ang Union Galvasteel gipangulohan sab ni Manolito Dejarme nga mikadlit og 27 puntos.
Ang liga nga nahimo ubos sa bendisyon ni ballclub president Henry Agbon, gipadagan ni commissioner Fury Trazona sa abag nilang Noel Calo, Jeper Inahid, Jpax Tagalog ug Choy Pilapil.
PUNTOS MATAG USA
Unang duwa:
RJ Store (87) – Baring 15, Yerro 14, Sayta 12, Rojo 11, Brigoli 10, Auman 9, Caparroso 9, Boquia 4, Pepito 4, Pepito 3.
PILAPILAN (61) – Atis 13, Royaks 9, CJ 9, Quijada 8, Teter 5, Bolande 4, Salogaol 4, Loyskie 4, Jinly 3, Orque 2.
Ikaduhang duwa:
CCKMS (70) – Rodriguez 17, Gamayon 15, Laurito 11, Sabang 8, Tampus 8, Apostol 7, Velbam 2, Ejay 2.
UNION Galvasteel (69) – Dejarme 27, Mantos 9, Mantos 7, Orongan 5, Capin 5, Boyles 4, Gellocane 4, Losano 2, Tudtud 2, Macasero 2, Arlabs 2.
- Latest
