PNG mosikad na

CEBU, Philippines – Ang mga tang-an  nga atleta lukop nasud magtakus na sa ilang abilidad gumikan kay ang Philippine National Games pormal nang mosikad karong adlawa diha sa Cebu City Sports Center diin si Presidente Rodrigo Roa Duterte maoy pinasidunggang dinapit ug mamumulong.

Usa ka engrandeng seremonyas ang gihan-ay sugod sa alas-3 sa hapon ang mobukas ning usa ka semanang torneyo nga gitawag og "Philippine Olympics" kay magsilbe man sab kining national championships sa mga partisipanteng NSAs (national sports associations).

"The opening will set the mood of the PNG. It's a never been seen presentation in any national games opening ceremony, we prepared a high tech and a very colorful show featuring the best of Cebu's talent. We want this to be a memorable event that the athletes will cherish in their athletic life," matud pa ni opening program coordinator Ricky Ballesteros.

Gawas ni Duterte, gipaabot sab nga motambong  niining makahuloganon nga kalihukan sila si boxing champion Sen. Manny Pacquiao, Philippine Sports Commission chair William 'Butch' Ramirez ug ang iyang mga commissioners, Executive Secretary Salvador Medaldea, Cabinet Sec. Leoncio Evasco Jr., Foreign Affairs Sec. Alan Peter Cayetano, Philippine Olympic Committee (POC) president Ricky Vargas ug secretary-general Patrick Gregorio.

Si PSC commissioner ug PNG overall chairman Ramon Fernandez maoy mangu sa pagdagkot sa urna uban sa pinili nga mga batan-ong atleta ug umaabot nga mga Olympians.

Makigduyog kanila ang kanhi ug kasamtangan mga Olympians nga si Roel Velasco ug Manuel 'Onyok' Velasco (boxing), Bong Coo (bowling), Django Bustamante (billiards), Hidylyn Diaz (weighlifting), Elma Muros Posadas (track and field), Cong. Mansour del Rosario (taekwondo), ug Eugene Torre (chess).

Dul-an sa 4,000 ka mga atleta ang magtige sa 21 ka sports, apil na ang track and field,  swimming, boxing archery, gymnastics, taekwondo, cycling ug weightlifting.

Banatan sab ang arnis, badminton, chess, dancesports, judo, karatedo, sepak takraw, softball, table tennis, tennis, triathlon, volleyball, beach volley ug rugby.

Isip ganti, ang PSC mohatag og insentibo pinaagi sa sports program ug equipment ngadto sa top 5 LGUs (local government units) diin ang makampiyon mobulsa og P5 million, samtang ang mopahiluna sa ikaduha ngadto sa ikalimang dapit modawat og P4M, P3M, P2M ug P1M.