Celtics mitagak sa Bucks: Makigsangka sa Sixers sa East conference semis
CEBU, Philippines — Sila si Al Horford ug Terry Rozier milansang og 26 puntos matag usa ug gani ang ilang karibal nga si Giannis Antetokounmpo nakatabang pa kanila sa dihang gipalagpot sa Boston Celtics ang Milwaukee Bucks human midaog sa Game 7, 112-96, sa ilang NBA first-round playoff series kagahapon didto sa TD Garden sa Boston, Massachusetts.
Gumikan niini, ang Celtics abante na sa ikaduhang hugna sa playoffs diin nag-atang kanila ang Philadelphia 76ers, nga hagbay rang mitagak sa Miami Heat sa baraha nga 4-1.
Si Horford duna say walo ka rebounds, si Rozier mipasa og siyam ka assists ug si Jayson Tatum midugang og 20 puntos sa Celtics nga mipahimus sa ilang homecourt advantage aron dag-on ang serye ug momartsa sa Eastern Confernce semis sa ikaduhang sunod-sunod nga season.
Si Tatum dunay nuybe puntos sa unang kuwarter diin ang Celtics mikadlit og 15 ka sagunson nga puntos apil na ang wala tuyoa nga follow-up shot ni Antetokounmpo aron pagposte og 13 puntos nga labaw, 30-17.
Igo lamang nakasikit ang Bucks ngadto sa dos puntos gumikan kay ang Celtics miresbak sab dayon aron pag-angkon og 50-42 nga bintaha sa first half.
Ilang banggaon sunod ang 76ers diin sila maoy mo-host sa Game 1 karong Martes.
Si Khris Middleton mi-iskor og 32, si Eric Bledsoe dunay 23 puntos ug si Antetokounmpo mipupo og 22 puntos ug siyam ka rebounds sa pilderong Bucks.
Naputol ang maanindot nga dagan sa Bucks, nga nakalahutay sa unang hugna sa playoffs kausa lamang sukad niadtong 1989. Napilde sila og siyam ka sunod-sunod nga playoff series sukad sila si Ray Allen, Glenn Robinson ug Sam Cassell midala ni George Karl sa Eastern Conference finals niadtong 2011. (BANAT NEWS)
- Latest
