Crack Legion nanghawod sa Cebu City Open Airsoft Series
CEBU, Philippines — Ang Crack Legion mipukan sa lain pang 13 ka lig-ong mga grupo aron pagdominar sa pasiunang leg sa 2018 Cebu City Mayor’s Cup Open Airsoft Series sa miaging weekend diha sa Sugbu grounds sa South Road Properties.
Gihuman sa Crack Legion ang duha ka adlaw nga tinirahay uban ang labing taas nga 770 points aron pagsakmit sa P30,000 nga ganti.
Ang Team Mizrach mipahiluna sa ikaduhang dapit uban ang 650 puntos, samtang ang Special Action Airsoft Team (SAAT) ug Eagles maoy miokupar sa nagsunod nga duha ka luna diin 10 puntos lamang ang ilang gintang. Ang SAAT mitali og 600 aron paglandig sa ikatulong puwesto, samtang ang Eagles dunay 590 puntos.
Mikuha sab og atensiyon ang Deep Recon human gitunolan sa Sportsmanship award, samtang ang SAAT maoy best in CQB (close quarter battle).
“I am very happy that we are able to revive the interest of the Cebuanos in airsoft through this friendly, yet highly competitive tournament,” matud pa ni Cebu City Councilor Jerry L. Guardo. “Rest assured our continued support for this undertaking.”
Hiniusang gi-organisar sa Southern Cebu Airsoft Recon (SCAR) nilang Alex Macaling ug Jeson L. Guardo ug sa Guadalupe Airsoft Team (GAT) ni Dionie Teban Baylon, ang maong kalihukan nahimong posible gumikan sa suporta sa Cebu City LGU ubos sa liderato ni Mayor Tommy Osmeña ug sa Cebu City Sports Commission (CCSC) pinaagi ni Commissioner Alan Borres Delantar. (BANAT NEWS)
- Latest
