Noynay nakadepensa sa bakus

CEBU, Philippines — Atubangan sa iyang mga katagilungsod, gipanalipdan ni Joe Noynay ang iyang WBO Asia Pacific Youth junior lightweight title sa usa ka kulbahinam nga sangka batok sa Mehikano nga si Hector Garcia niadtong miaging gabii didto sa Don Celestino Martinez, Sr. Sports and Cultural Center sa Bogo City.

Dili sayun ang giagian sa Cebuano fighter tungod kay mipakita og kalig-on si Garcia kinsa nakigsinukliay og kumo kaniya hangtud sa ika-12 nga round.

Gisuklan hinuon ni Noynay ang gipahamtang nga presyur kaniya ni Garcia ug mipaigo siya og mga counter-punches aron paatrason ang Mehikano. Gigamit usab ni Noynay ang iyang pabor sa footwork aron lihayan si Garcia.

Usa ka hait nga uppercut ang gipaigo ni Noynay sa eight round nga miresulta sa pagdugo sa ilong sa Mehikano, apan ang nauwahi wa mipakita og paglubad sa iyang pagsige og atake.

Nagisian ang duha ka boksidor sa final round, apan wala kini mipaundang sa grabeng sinukliay tali sa duha ka boksidor.

Human sa tulo ka rounds, duha ka mga hurado ang mihatag og 96-94 ngadto sa Cebuano, samtang usa ang mitabla sa iskor, 95-95. Miresulta kini sa majority decision nga kadaugan alang ni Noynay.

Sa ubang mga sangka, si Cris Alfante mipaundang ni Ryan Tampus, si Al Toyogon mi-KO ni Jason Tinampay sa first round, si Alvin Madura midaog sa puntos batok Lobert Bayo, si Justin Darap midesisyon ni Ronel Sumalpong, si Richard Sueno midaog batok Jeco Suico, si Cris Paulino mikulata ni Marvin Tampus, samtang ang female boxer nga si Machieka Pareno midaog pinaagi sa unanimous decision batok ni Jean De Paz. (BANAT NEWS)