Canelo-Golovkin ‘rematch’ gikanselar

CEBU, Philippines — Dili mahinayon ang gikahinaman untang ‘rematch’ nilang Canelo Alvarez ug Genady Golovkin.

Kini human miatras si Alvarez sa ilang middleweight title bout ni Golovkin, duha ka bulan human siya nagpositibo duha ka higayon sa ginadiling matang sa droga.

Basi sa resulta sa boluntaryong drug test, si Alvarez nagpakita og timaan nga dunay clenbuterol sa iyang sistema. Sagad gamiton sa mga hubakon, ang clenbuterol dali makapahilis sa tambok ug makapakunhod sa timbang niadtong mga tiggamitan niini.

Apan si Alvarez mi-insister nga dili siya tikasan nga atleta ug wala niya tuyoa nga makagamit og clenbuterol. Ang iyang  promoters mitumbok sa kontaminadong karne nganong nakagamit si Alvarez og clenbuterol

Ang ila untang ‘rematch’ karong Mayo 5 didto sa Las Vegas maoy rematch sa kontrobersiyal nilang unang away nga gideklara og tabla niadtong Septiyembre sa miaging tuig.

Samtang ang mga promoters ni Golovkin mangita na karon og bag-ong kontra alang ni Triple G nga kasamtangang  WBA, WBC, IBF ug IBO middleweight champion.