Lady Eagles dadapo sa semis
Laro Ngayon (The Arena)
2pm UST vs ADMU
4pm NU vs UP
MANILA, Philippines — Target ng Ateneo na masungkit ang ikalawang silya sa Final Four sa pakikipagtipan nito sa University of Santo Tomas sa pagbabalik-aksiyon ng UAAP Season 80 women’s volleyball tournament ngayong hapon sa The Arena sa San Juan City.
Nakatakda ang engkuwentro ng Lady Eagles at Tigresses sa alas-2 na susundan ng krusyal na duwelo ng National University at University of the Philippines sa alas-4.
Hawak ng Ateneo ang solong ikalawang puwesto tangan ang 7-3 baraha habang nangunguna ang nagdedepensang La Salle na nauna nang umabante sa semis matapos kubrahin ang 9-2 marka.
Nasa ikaanim naman ang Tigresses hawak ang 4-7 rekord.
Ngunit kung matatalo ang UST, tuluyan na itong mamamaalam sa kontensyon at maiiwan sa Far Eastern University (7-4), NU (6-5) at Adamson (5-6) ang gitgitan para sa nalalabing tiket sa Final Four.
Kukuha ng lakas ang Lady Eagles sa mga beteranong manlalaro nito sa pangunguna ni open hitter Jhoana Maraguinot na siyang top scorer ng tropa.
Nariyan din si dating Rookie of the Year winner Kat Tolentino at sina middle blockers Maddie Madayag at Bea De Leon.
Malaki rin ang kontribusyon ni opposite hitter Jules Samonte sa opensa.
Magsisilbing lider ng Ateneo si playmaker Deanna Wong na kandidato sa Best Setter award sa season na ito.
“We’ll just continue playing happy as coach Tai (Bundit) always tells us. We just need to enjoy the game and have that ‘heart strong’ mantra,” wika ni Madayag.
Sa kabilang banda, ilalabas na ng Tigresses ang lahat ng kanilang bangis upang manatiling buhay ng kanilang tsansa sa Final Four.
Walang iba kundi si wing spiker Cherry Ann Rondina ang pangunahing aasahan ng Tigresses.
Si Rondina ang top scorer sa liga at kabilang sa mga MVP candidates.
- Latest
