Smart Candy dale ang ika-2 dikit na 3YO Stakes Race
CARMONA, Cavite, Philippines — Ipinagpatuloy ng Smart Candy ang dominasyon sa tinatakbuhang dibisyon sa San Lazaro Leisure Park dito.
Ito ay matapos ungusan ng Smart Candy sa pagdadala ni jockey Kelvin Abobo ang Wonderland at Victorious Colt sa bilis na isang minuto at 41 segundo sa 1,600-meter 3rd leg ng 2018 Philippine Racing Commission’s 3YO Local Fillies and Colts Stakes Race.
Ang distansya ay mas mahaba ng 100 metro kumpara sa second-leg distance na naipanalo rin ng Smart Candy.
“Sa tingin ko, kaya niyang makipag-compete sa mahabang distansiya. First time niyang tumakbo ng mile. Maganda ang pinakita niya,” sabi ni Abobo.
Hindi nahirapan si Abobo na dalhin ang Smart Candy sa unahan ng labanan.
“Gusto niya sa harapan, kaya hindi kami masyadong nahirapan,” ani Abobo sa Smart Candy, nagbigay sa horse owner na SC Stockfarm ng premyong P600,000 mula sa kabuuang guaranteed purse na P1 milyon.
Sinabi naman ni trainer Chito Santos na ang karera ay nagsilbing paghahanda ng Smart Candy para sa Triple Crown sa susunod na buwan.
Ito ang ikaanim na panalo ng Smart Candy.
Nakuha naman ng Wonderland nina owner Herminio Esguerra at jockey Pat R Dilema ang P225,000, habang itinakbo ng Victorious Colt nina owner Jose Antonio Zialcita at jockey OP Cortez ang P125,000.
Samantala, mas minabuti ng Philracom na palitan ang kanilang weekend schedule dahil sa darating na bakasyon.
Sa isang resolution, ang mga karera ay gagawin sa Hunyo 30 mula sa dating iskedyul na Abril 1.
Ang mga Saturday schedules ay dapat pakawalan sa alas-4 hapon na may maximum 10 races habang ang maximum naman sa Linggo ay 12 races kung saan bibitawan ang Race No. 1 sa alas-3 ng hapon.
- Latest
