CdSL-V Hotel, Wang’s Ballclub wagi sa MBL
MANILA, Philippines - Umiskor ng magkahiwalay na panalo ang Colegio de San Lorenzo-V Hotel at Wang’s Ballclub sa pagbabalik-aksyon ng 2017 MBL Open basketball championship kagabi sa EAC Sports Center sa Manila.
Sumandig ang Blue Griffins sa matikas na import na si Chabi Soulmane para itakas ang 72-69 pananaig laban sa Emilio Aguinaldo College Generals.
Tumapos ang Nigerian import na si Soulmane ng 19 puntos sa kanyang debut game sa kumpetisyong itinataguyod ng Smart Sports, Ironcon Builders, Star Bread, Dickies Underwear at Gerry’s Grill.
Nakatuwang ni Soulmane si NCR UCLAA MVP Jun Gabriel sa pagbibigay ng matibay na depensa para sa Blue Griffins.
Samantala, ginamit naman ng Wang’s ang kanilang malawak na karanasan para silatin ang Victoria Sports-MLQU, 76-74 sa isa pang laro.
Trinangkuhan ni Michael Juico ang opensa ng Wang’s sa kanyang tinapos na 18 puntos, habang nag-ambag naman sina Jeff Tayontong at Mark Montuano ng tig-17 puntos para makamit ang ika-2 panalo.
- Latest
