Mga PUJ drivers supak nga sakmiton ang ilang lisensiya

CEBU, Philippines - Duha ka kahugpongan sa mga drayber og PUJ nga nagbiyahean dinhi sa dakbayan sa Sugbo kusganong misupak sa gisugyot nga ordinansahon nga maghatag og katungod sa mga traffic enforcer pagsakmit sa driver’s license bisan wala sila’y Temporary Operators Permit (TOP).

Sila si Armando de Gracia sa grupo nga Alyansa sa Nagkahiusang Drayber Alang sa Reporma (ANDAR) ug si Romeo Armamento sa National Confederation of Transport Workers’ Union (NCTWU) miawhag sa mga konsehal sa dakbayan nga dili aprobahan ang ordinansa.

Sila si Konsehal Eugenio Gabuya Jr. ug Margarita “Margot” Osmeña maoy misugyot niining maong ordinansahon aron hatagan og gahum ang mga traffic enforcers sa dakbayan nga makasakmit og lisensya sa mga drayber bisan wala sila’y TOP.

Pagka karon wala’y bisan usa sa dul-an sa 300 ka traffic enforcers sa dakbayan sa Sugbo nga giisyuhan og TOP sa Land Transportation Office (LTO) tungod sa ilang palisiya nga kadto ra nga mga regular nga kawani maoy isyuhan og TOP.

Ang mga drayber, ilabi na ang mga nagmaneho og PUJ, dili mahadlok nga mohimo’g kalapasan sa balaod sa pagmaneho og sakyanan tungod kay ang mga traffic enforcers armado lang og Traffic Citation Ticket (TCT) nga wala magtugot kanila pagkunpiskar sa mga lisensiya.

Gibatbat sa duha ka lider sa kahugpongan sa mga PUJ drayber nga ang Section 29 sa Transportation and Traffic Code nagtugot ra sa mga LTO deputized agents nga maoy makasakmit sa lisensiya sa mga masalaypong drayber.

Ila usab nga gibatbat ang laing lagda sa maong balaod nga nagdili sa mga legislative bodies sa mga Local Government Units (LGU) sa pagmugna og ordinansa nga makasupak sa maong balaod.

Apan ang mga konsehal nagtoon karon kay didto sa kaulohan gikataho nga ang mga traffic enforcers sa Metro Manila Development Authority (MMDA) gitugotan na pagsakmit sa lisensiya sa masalaypong drayber bisan og wala sila’y TOP. (BANAT NEWS)