Blackwater miiskor na gyud og daog

CEBU, Philippines - Nagmangtas si Greg Smith diin miburak siya og 40 puntos ug milangkat og 19 ka rebounds aron pangulohan ang Blackwater Elite   nga midaog na gyud human gipilde ang GlobalPort Batang Pier, 118-113 sa  PBA Commissioner’s Cup kagabii didto sa Mall of Asia Arena.

Kini ang labing una nilang daog sud sa lima ka duwa.

Si Smith mao sab ang  pabilo sa  fourth quarter rally sa Blackwater dihang mihipos siya og 15 puntos alang sa maong  kadaugan.

Sila si Mike DiGregorio ug Reil Cervantes mitampo’g 18 ug 14 puntos matag usa.

Ang Batang Pier  labaw, 95-88 sa sayong bahin sa final period,   apan nakahimo sila og mga krusyal nga turnovers hinungdan nga  nahilis ang ilang labaw. Si Smith mihimo og duha ka sunod-sunod nga krusyal nga jumper nga maoy mihatag sa 116-113 nga labaw sa daginutong segundos sa duwa.

Si Terrence Romeo    mirehistro og 35 puntos  sa napildeng GlobalPort nga adunay 0-5 nga baraha, samtang ang import nga si Malcolm White miamot og 33 puntos. (BANAT NEWS)