Abarquez midaog tulo ka titulo sa JRG Tennis Cup
CEBU, Philippines - Ang taga Carcar City nga si Elizabeth Abarquez misakmit og tulo ka titulo aron mangulo sa tanang mga mananaog sa 22nd JRG Gullas Tennis Cup nga natapos kagahapon didto sa Naga City covered court.
Si Abarquez midaog sa girls 16 ug 18 ug ingon man sa girls 18 doubles event uban ni Shyne Villareal.
Mirehistro siya og dominanteng kadaugan, 6-1, 6-1 batok ni Lyrah Mae Repollo sa girls 16 finals.
Dayon 6-2, 6-4 nga daog batok ni Villareal aron maghari sa girls 18.
Ang tandem nila ni Abarquez ug Villareal mipilde nila ni Pherl Bless Coderos ug Cristelle Marie Sampan sa iskor nga 8-2.
Sa laing bahin, si Tiffany Nocos sa Lapu-Lapu City, mihimo sab og dobleng kadaugan human manghawod sa girls 12 ug girls 14.
Gipilde ni Nocos si Repollo, 7-5, 2-6, 10-6 aron masakmit ang girls 14 title ug gipilde sab niya si Jullina Maravillas, 6-0, 6-3 sa girls 12
Si Nicholas Ocat sa Ormoc City maoy milangkat sa boys 12 title batok ni Hans Cabellon, 6-1, 6-4.
Mokompleto sa lista sa mga mananaog mao sila si Vincent John Cañete (unisex-10 under), John Clyde Patterson ug Venz Alforque (boys 18 doubles) ug Gabriel Trazo sa boys 14 division. (BANAT NEWS)
- Latest
