Game-1 sakmiton sa Alab

CEBU, Philippines - Magsangka na ang Alab Pilipinas ug Singapore Slingers sa Game-1 sa “best-of-three” semifinals series sa Asian Basketball League karong gabii didto sa OCBC Arena sa Singapore.

Ang Alab bidahan karon sa duha ka kanhi collegiate standout nga sila si Ray Parks Jr. ug Kiefer Ravena nga magduwa sa labing unang higayon sa usa ka team. Si Ravena maoy labing uwahing adisyon sa koponan human sa iyang mubo nga partisipasyon sa NBA Developmental League.

Anaa usab ang duha ka American import nga sila si Justin Howard ug Sampson Carter nga maoy gisaligan ni coach Mac Cuan sa depensa ug rebounding.

Maisip nga underdog ang Alab tungod kay ang Singapore mitapos sa elimination uban ang  13-7 record itandi sa ilang 11-9 nga baraha. Ang modaog sa series moharong sa modaog tali sa topseed   Hong Kong Eastern Lions ug Saigon Heat sa finals. (BANAT NEWS)