AC Troopers mitokhang sa team Tion

CEBU, Philippines - Nakatokhang na sab ang AC Troopers sa pagpangulo ni P/Insp. Dondon Coloscos nga naghatag kanila og dugang  paglaum  nga moabante sa quarterfinals round sa  CELBA First  Conference Basketball Tournament 2017.

Ang AC Troopers wa’y puangod nga nimasaker sa team Tion, 73-50 niadtong Miyerkules sa gabii didto sa Canduman Housing gym, Mandaue City.

Si  Joel Cabahug maoy nangu sa makalisang nga ataki sa AC Troopers nga mirakrak og 12 puntos.

Interesante kay tanang 15 ka players sa AC Troopers ang mitabang og rapido  hinungdan nga nagkapuliki og panagang ang team Tion.

Ang team manager nga si P/Insp. Dondon Coloscos mipabuto og 10 puntos ingon man silang Opong Englis ug Rex Gonzaga sa AC Troopers.

Si Flor Capua maoy misalida og maayo sa team Tion nga mikabkab og 20 puntos, samtang si Gerry Prieto mitikdol og 10 puntos sa team ni Rex Tion.

Usa ka lugas lang unta ang labaw sa AC Troopers sa halftime, 24-23, apan sa dihang anaa na sila sa entrada sa third period, kalit nga misulbong ang ilang labaw, 64-36 paghuman sa third quarter.

Sa pasiunang duwa, naklaro na ang kahigayonan sa team Lisen nga moabante sa sunod round human sa ilang kadaugan batok sa undermanned nga MS Motosuit, 79-66.

Ang 6-2 nga team Lisen gipangulohan ni Erwin Budiongan nga miburak og 19 puntos, gisundan ni Jealvan Achumbre sa iyang 17 puntos, samtang ang team manager nga si Gilbert Lisen miambit og 15 puntos sa iyang team nga nakarekober human sa 25-37 nga biya sa halftime.

Ang big boss sa MS Motosuit nga si Lou Ornopia mikadlit unta og 20 puntos, lakip ang tulo ka triples sa first quarter,  apan nakawang lang kay nasugamak na sab ang iyang team.

Si Suson mitampo’g 14 puntos, samtang sila si Gilbert Sebandal ug Cris Ubas parehong mitimbre’g 10 puntos.

Gipaluyohan sa Silogan Ni Gian, ang liga gipadagan ni commissioner Albert ‘Obeth’ Ramos sa abag nilang Willy Medillo ug Lloyd Chavez.

Puntos matag usa

Unang duwa:

LISEN (79) – Budiongan 19, Achumbre 17, Lisen 15, Recto 8, Pacquiao 6, Villaflores 4, Mendoza 4, Roger 4, Tigue 2, Damaolao 2, Ecot 2.

MS Motosuit (66) – Ornopia 20, Suson 14, Sebandal 10, Ubas 10, Tungal 7, Yatan 5.

Ikaduhang duwa:

AC Troopers (73) – Cabahug 12, Coloscos 10, Englis 10, Gonzaga 10, Suico 6, Bontilao 6, Ferolino 6, Miñoza 5, Saldua 4, Chavez 3, Limosnero 3, Dakay 2, Molit 2, Baclay 2, Buenavista 2.

TION (50) – Capua 20, Prieto 10, Mahipos 9,  Templado 5, Tion 4, Abelong 2. (BANAT NEWS)