Sir Litz basketball camp sa Liloan

CEBU, Philippines - Ang mga batan-on nga Sugbuanong basketbolista dunay laing opsiyon aron bairon og maayo ang ilang abilidad pinaagi sa Sir Litz One on One Basketball Training Camp nga gikatakdang sugdan karong Abril 2 didto sa   Yati Elementary School  covered court sa Yati, Liloan.

Si training director Edcel Vallena, kanhi collegiate standout ug beteranong coach, nagkanayon nga ilang itudlo sa mga bata mao ang siyentipikong estilo sa American ug Korean basketbol atol sa usa ka bulan nilang camp nga abli sa mga babaye ug lalaking magduduwa nga nag-edad og siyete anyos pataas.

“Wa damha nga naa na kita ron sa ika-17 nga tuig sa atong training camp. Sa tinuoray lang, lisud gyud ang pagsustinir niini,” matud pa ni Vallena.

Si Vallena mapasigarbuhon kaayo sa usa sa labing maayo nilang produkto nga si John Paul Desiderio, ang star guard sa University of the Philippines (UP) Maroons nga nagduwa sab karon uban sa Cafe France sa PBA D-League.

Lumad nga Liloanon, si Desiderio nahimong labing unang UP player sud sa usa ka dekada nga naapil sa Mythical 5 sa prestihiyosong UAAP sa miaging season.

“Proud kaayo ko mosulti nga si Desiderio usa sa labing maayo natong produkto. Dinhi na siya nagsugod nato sa dihang nag-edad pa siya og nuybe anyos ug tan-awa unsa na iyang naabot karon. Usa siya sa nakapadasig nako nga motabang pa sa ubang players aron makab-ot ang ilang ambisyon,” dugang pa ni Vallena.

Sa karon nga edisyon, si Vallena mipahibawo nga ang ilang training magsugod sa alas-8 sa buntag hangtod sa alas-12 sa udto. Kadtong magparehistro makadawat og reversible jersey. Alang sa dugang impormasyon, kadtong mga interesado mahimong mokontak sa  0906-4683775 o 0943-6068834. (BANAT NEWS)