Danao mo-host sa Xterra South

CEBU, Philippines - Kapin sa 100 ka mga atleta, apil na ang pipila ka mga pros nga gipangulohan ni world champion Ben Allen ang nagpanikad nang mopakita og aksiyon sa Xterra South nga gikatakda karong Abril 23 didto sa dakbayan sa Danao.

Gawas ni Allen ug sa iyang pangasaw-onon nga si Jacque Slaq, lain pang pro-triathletes nga mosalmot mao sila si Bradley Weiss sa South Africa, Takahiro Ogasawa sa Japan, Taylor Chariton, Sam Osbourne, Carina Wesle sa Austria, Kiera McPherson, Myriam ug Jacky Boisset, Brodie Gardner ug Jessica Koltz.

“This is a great opportunity to promote Danao City. We will do our best to showcase the city and provide an unforgettable race to the participants,”  matud  pa ni Cebu 5th District Rep. Red  Durano  atol  sa press conference kagahapon didto sa Danao Coco  Palms Resort.

Gawas sa pro open, duna sa’y mga age-groups nga kumbatihan sa makutas nga lumba nga naglangkob og 1,500m swim, 40km bike ug 10km trail run.

“With the cancellation of Xterra La Union, triathletes will have longer to train and prepare for the Danao race, ensuring a fierce battle for top honors in one of the toughest off-road races,” nagkanayon si Princess Galura, ang general manager sa Sunrise Events nga maoy nag-organisar sa maong event.

Gawas sa full-distance, duna sa’y Xterra lite alang sa mga  bag-o  pa ning matang sa karera. Niadtong mga dili makamao molangoy, dunay duathlon nga gihan-ay alang kanila. (BANAT NEWS)