Manangquil pasidunggan isip 'Promoter of the Year' sa elorde award
CEBU, Philippines - Si Jim Claude Manangquil, ang Chief Executive Officer sa Sanman Promotions, gikatakda nga pasidunggan isip “Best Promoter” sa prestihiyosong 17th Gabriel ‘Flash’ Elorde Boxing Memorial Awards and Banquet of Champions karong Marso 25 didto sa The Tent sa Manila Hotel.
Ang 24-anyos nga si Manangquil maoy labing bata nga modawat sa maong tinuig nga pasidungog. Siya sab maoy labing bata nga boxing promoter ug manager sa edad nga 14-anyos niadtong 2007.
“I was encouraged by my brother John Ray in boxing. In fact, I also trained as a boxer because of him” matud pa ni Manangquil, ang unang miporma sa JM Promotions nga nagbasi sa General Santos City usa ka dekada na ang milabay.
Iya dayon gitukod ang Sanman Promotions uban sa iyang maguwang nga si John Ray ug higala nga si Dexter Tan, kinsa mao karon ang ilang Chief Finance Officer. Sa miaging tuig, ang Sanman nakapasiugda og siyam ka promosyon, pito niini championship fights nga naglangkob sa IBF, WBC ug WBF. Gawas ni Manangquil, ang iyang mga boksidor nga sila si John Vincent Moralde, Reymart Gaballo, Mike Plania, Randy Petalcorin ug Romero Duno pasidunggan sab atol sa Elorde Awards Night. (BANAT NEWS)
- Latest
