Talisay Beach Volley banatan na

CEBU, Philippines - Miabot ngadto sa 11 ka mga koponan ang magtige alang sa titulo sa 2017 Talisay City Sports Commission Beach Volley Invitational   sugod karong adlawa diha sa Poblacion, dakbayan sa Talisay.

Ang maong torneyo kabahin sa selebrasyon sa ika-72 nga anibersaryo sa makasaysayanong Talisay Landing karong Marso 26 diin ang kampiyonato gikatakda nga kumbatihan.

Magsangka sa men’s division mao ang University of the Visayas (UV), Southwestern University (SWU), University of Southern Philippines Foundation (USPF), University of Cebu (UC) , University of San Jose-Recoletos (USJ-R)  ug University of Bohol (UB).

Mobida sa UV mao si kanhi Philippine team member Jade Becaldo, samtang si SWU coach Roy Ulan maoy mangu sa iyang kampo.

Sila si Edward Ybañez, Left John Tormis ug Dan Adrian Garnica maoy mowadwad sa USPF, ang USJ-R magsandig nilang Kent Jay Verbosidad, Niño Gairanod ug R.A. Tecson, samtang ang UC maglaum nilang Fortunato Libres, Alexander Pelino ug Jerson Lopos. Magbugno sa women’s bracket ang USPF, USJ-R, UB, UC ug Team Lazan. (BANAT NEWS)