Magsayo batok veteran Tanzanian sa ‘Pinoy Pride 40’
CEBU, Philippines - Ang undefeated ALA Boxing Gym fighter nga si Mark ‘Magnifico’ Magsayo (15-0, 11KOs) makigsangka sa beterano nga si Issa ‘Peche Boy’ Nampepeche (24-7, 11KOs) sa Tanzania sa Pinoy Pride 40 sa Abril 29 diha sa Waterfront Cebu City Hotel and Casino.
Ang Magsayo-Nampepeche showdown maoy undercard sa gikaintapang IBF flyweight championship match ni Donnie ‘Ahas’ Nietes ug Thai contender Komgrich Nantapech.
Ang 21-anyos nga si Magsayo masuwayan batok sa Tanzanian, kinsa naanad na og sangka gawas sa iyang nasud. Si Nampepeche miaway na usab sa upat ka weight divisions lakip na sa light flyweight, super bantamweight, featherweight ug lightweight.
Sa laing bahin, ang knockout artist sa Tagbilaran City subsob ensayo na sa ALA Boxing Gym. Lab-as pa siya sa iyang dominanteng unanimous decision nga kadaugan batok ni Mexican Ramon Robles aron depensaan iyang WBO International featherweight title niadtong Septiyembre 26 didto sa California.
Moaway usab sa Pinoy Pride 40 ang laing ALA rising star nga si Jeo ‘Santino’ Santisima batok sa wala pa hinganling langyaw’ng mga kontra. (BANAT NEWS)
- Latest
