Nagpanikad na si Tepora
CEBU, Philippines - Masaligon ang wa’y pildeng bitoon sa Omega Boxing Gym nga si Jack ‘Golden Boy’ Tepora nga makaiskor og “knockout” sa iyang sangka batok ni Indonesian Yon Amed sa labing una niyang pagdepensa sa iyang WBO Oriental junior featherweight title sa main event sa “Who’s Next? Pro Boxing Series 4” karong Sabado diha sa Waterfront Cebu City Hotel and Casino.
Si Tepora wala pa’y pilde sa 19 ka away ug 14 sa iyang mga biktima pulos niya gipatikangkang timaan sa iyang kusog ug bug-at nga mga kinumo. Gani iyang gipalukapa ang siyam sa katapusan niyang 10 ka kontra. Bugtong nakalahutay sa iyang makabungog nga suntok mao si Andrew Palas sa ilang PBF super bantamweight title fight niadtong 2014.
Kay napamatud-an na ang kahait sa iyang abilidad, si Tepora wa’y lipud-lipod nga mipadayag sa iyang tinguha nga ma-world champion ug sangkaon ang labing banggiitan nga mga boksidor sa iyang dibisyon.
Apan sa dili pa maghuna-huna niining tanan, si Tepora kinahanglan usa nga modaog batok sa 30-anyos nga si Yon Amed nga beterano sa 21 ka away. Inilog hinuon kaayo siya batok sa bisitang Indon nga dunay 14-7 record ug moaway sa Pilipinas sa ikaduha pa lamang nga higayon. (BANAT NEWS)
- Latest
