Abella bag-ong rayna sa AWUM

CEBU, Philippines - Ang tadhan nga long distance runner nga si Lizane Abella maoy gikoronahang bag-ong rayna sa 6th All-Women’s Ultramarathon (AWUM) nga natapos sayo kagahapon sa buntag didto sa Il Corso sa South Road Properties.

Si Abella, lumad gikan sa Pusok, Lapu-Lapu City apan anaa na karon magpuyo sa Tungkop, Minglanilla, mihimo gilayon og impresyon sa labing una niyang ultra race dayon na ngadto sa pagksamit sa korona.

Iyang gitapos ang makutas nga 50 ka kilometro nga lumba sud sa upat ka oras, 30 minutos ug 32.93 segundos. Abante siya og 14 minutos sa kanhi kampiyon nga si Sandra Soliano, samtang si Preciosa Sanchez maoy nalandig sa ikatulong puwesto sa oras nga 4:59:01.93.

Sila si Abella, Soliano ug Sanchez parehong sakop sa Spectrum Runners.    

Ang batos sa Omega Pro nga si June Marq Ocana mitapos sa ikaupat nga dapit sa oras nga 5:05:49.01, samtang si Jennifer Red Sabela sa Cagayan de Oro maoy ikalima sa oras nga 5:07:37.51.

Naglangkob sa top 10 mao sila si Rona Lacanlale (5:15:16.15), Marivic Mari (5:17:04.36), Wilma Theresa Lugay (5:17:40.42), Janice Gabales (5:18:26.75) ug Rhoda Oporto (5:18:31.12).

Ang guest runner nga si Tess Leono mitapos sa karera sud sa pito ka oras. Si Leono mihimo og kasaysayan isip labing unang Pinay nga nakahuman sa Badwater Ultramarathon, ang gi-ilang labing lisud nga running event sa kalibutan diin ang mga entrante mag-agi pa sa usa ka disyerto. Iyang gitapos ang 216 ka kilometro nga distansiya sud sa 46 ka oras, usa ka minuto ug 29 segundos. (EBV) (BANAT NEWS)