Manayon bayani sa Geobert

CEBU, Philippines - Ang 3-point shot ni Rayven Manayon sa nahabiling 11 segundos sa duwa maoy mipadaog sa Geobert Merchandise batok sa Gabela Balloons pagsugod sa Vendredi Basketball Club Valentine’s Cup 2017 niadtong Lunes didto sa Garden Bloom subdivision open court sa  Pitogo, Consolacion.

Sa pasiunang duwa, midaog sab ang Sweets To Go pinaagi sa paglubong sa Laura’s Store, 112-100.

Dumadaog na unta ang Gabela dihang labaw sila og  usa ka lugas sa daginutong segundos sa duwa, apan si Manayon mibuhi sa iyang marka-bahala nga 3-pointer aron luwason ang Geobert.

Si  Keith Taishun maoy topscorer sa Geobert nga mikulit og 21 puntos, gisundan ni Ben Soy sa iyang 16 puntos, samtang si Manayon adunay 13 puntos.

Sila si Gary Alisoso ug  Zerk Rosalejos mitampo’g 11 ug 10 puntos.

Mipatuasik unta og 30 puntos si Gabela team manager  Joel Pitogo, apan dili kini igo aron mapadaog niya ang iyang koponan kay kuwang siya og suporta sa iyang kaubanan. Si Brian  Sinadjan mitikdol og 18 puntos, samtang si Virgilio Pepino mitimang og 16 puntos.

Ubos sa pagtugot sa ilang presidente nga si Gary Rojas, ang liga gipadagan ni commissioner Magen Dave Pernito.

Puntos matag usa

Unang duwa:

SWEETS TO GO (112) –  Capao 33, B. Abrasado 23, Congson 21, A. Abrasado 13, Guanga 11, Maglasang 6, Bragas 3, Casipong 2.

LAURA’S STORE (100) – Sanchez 23, Juanillo 20, Pernito 16, Montes 14, Juanillo 11, Saitama 10, Burlaos 6.

Ikaduhang duwa:

GEOBERT (75) – Taishun 21, Soy 16, Manayon 13, Alisoso 11, Rosalejos 10, Olamit 4.

GABELA  (73) – Pitogo 30, Sinadjan 18, Pepino 16,  Goc-ong 5, Ares 4.