Star andam sa Ginebra

CEBU, Philippines - Gitan-aw ni Star Hotshots coach Chito Victolero ang ilang koponan nga ‘underdog’ batok sa Barangay Ginebra nga maoy ilang ikaharong  sa  ilang “best-of-seven” semifinal series sa PBA Philippine Cup sugod karong gabii didto sa Smart Araneta Coliseum.

Matud ni Victolero nga pabor sa kasinatian ang Ginebra nga mikampiyon sa miaging Governors’ Cup, apan giklaro niya nga andam iyang mga batos ug dili sila magpalupig sa maong serye.

Kini ang unang season ni Victolero sa Star  human niya pulihi si Jason Webb isip coach, apan nakaplagan niya ang ensaktong sistema aron molampos iyang koponan  sa pagpangulo sa mga guwardiya nga sila si Paul Lee, Ian Maliksi ug rookie Jio Jalalon.

Nakapabor hinuon og gamay ang Star  tungod kay  sayo silang nakapahuway human nila gitagak ang Phoenix Fuel Masters sa quarterfinals, samtang ang Ginebra miagi pa og duha ka makutas nga duwa batok sa Alaska.

Sa iyang bahin, si multi-titled coach Tim Cone namahayag nga dili sila ang nakapabor  kun di ang Star nga iyang gitan-aw nga maoy labing init nga koponan atol sa elimination round.

Si Cone nga nahimong  coach sa Star sa wala pa siya mitapon sa Ginebra, nagkanayon nga grabe ang kalamboan sa koponan ubos ni Victolero ug kompleto usab kini sa rikados nga makigbangga kanila. (BANAT NEWS)