Gipanglubong

CEBU, Philippines - Duha ka powerhouse teams sa Western Conference  San Antonio Spurs ug Golden State Warriors ang mipakita sa ilang kadominante batok sa tagsa-tagsa nila ka mga kaatbang kagahapon sa nagkainit nga aksiyon sa NBA sa managlahing binyu.

Ang Spurs wa’y kukaluoy nga  milubong sa Los Angeles Lakers sa iskor nga 134-94 ubos sa pagpangulo ni Kawhi Leonard, kinsa mitusak  og 31 puntos.

Ang Spanish veteran star nga si Pau Gasol mirehistro sab og 22 puntos ug milangkat og siyam ka rebounds alang sa Spurs nga ikaduha na karon sa  Western Conference uban ang 31-8 nga baraha.

Sa ilang bahin, ang Warriors  nagmangtas sa ilang balwarte sa Oracle Arena ug  ilang gilat-an ang Detroit Pistons sa iskor nga 127-107.

Si Kevin Durant maoy  nangu sa opensa sa Warriors nga mipatuasik og 25 puntos, samtang si Stephen Curry  mipaksit og 24 puntos.

Laing rekord na usab ang gikulit sa Warriors human sila makaabot og 30 o sobra ka assists sud na sa 27 ka sunod-sunod nga duwa.

Didto sa Madison Square Garden, ang homecourt sa New York Knicks nakabawi human sa ilang kapildihan sa Philadelphia 76ers niadtong Huwebes dihang ilang gipanitan ang Chicago Bulls,104-89.

Gipahimuslan sa Knicks ang kakuwang sa players sa Bulls, kinsa miduwa nga wala sila si Jimmy Butler ug Mikola Mirotic.

Nangulo sa kadaugan sa Knicks mao si Carmelo Anthony nga mipabuhagay og  23 puntos.

Si Dwyane Wade midaro og 17 puntos sa naparot nga Bulls.

Sa lain pang mga resulta, ang New Orleans Pelicans  midaog batok sa Brooklyn Nets 104-95 bisan pa og wala miduwa ang ilang star player nga si Anthony Davis tungod sa injury.

Si Tyreke Evans maoy midala sa opensa sa Pelicans aron moiskor og 29 puntos. (BANAT NEWS)