Soltones iginiya ang Lady Stags sa panalo laban sa Lady Altas

MANILA, Philippines – Hindi maawat ang San Sebastian College nang isa­ma nito ang University of Perpetual Help System Dalta sa kanilang mga bik­tima sa pamamagitan ng 25-22, 25-13, 25-13 pana­lo upang manatiling malinis ang kanilang rekord sa NCAA Season 92 women’s volleyball tournament sa The Arena sa San Juan City kahapon.

Nagbalik na ang bangis ni reigning two-time MVP Grethcel Soltones nang mag­pasabog ng 19 puntos tampok ang 18 sa attack line para dalhin ang Lady Stags sa ika-pitong sunod na panalo at makalapit sa inaasam na sweep.

Naging malakas na su­porta sina Katherine Ville­gas at Joyce Sta. Rita na ku­mana ng tig-pitong puntos gayundin si Nikka Dalisay na may nai-ambag na limang puntos.

Maganda rin ang inilaro nina skipper Vira Guillema na may 34 excellent sets at Alyssa Eroa na naglista ng 21 digs at 7 receptions.

Tanging si Lourdes Clemente lamang ang nagre­his­tro ng double digits para sa Lady Altas tangan sa kanyang 10 puntos, habang nalimitahan sa apat sina Coleen Bravo, Jamela Suyat at Jowie Verzosa, at tatlo si team captain Cindy Imbo.

Nalaglag sa 4-3 ang baraha ng Lady Altas.

Dalawang panalo na lamang ang kailangan ng San Sebastian para awto­matikong umusad sa finals.

Sasagupain ng kopo­nan ang Lyceum of the Phil­ippines University sa Ene­ro 23 at ang nagdedepensang College of Saint Benilde sa Enero 25.

Pinataob naman ng Arellano University ang Be­nilde sa bendisyon ng 25-21, 25-21, 25-21 panalo upang masolo ang ikalawang puwesto tangan ang 6-1 rekord.

Nanguna sa atake ng Lady Chiefs si dating National University standout Rialen Sante na pumalo ng 15 puntos katuwang sina Jovielyn Prado na gumawa ng 13 puntos at Erica Calixto na nagdagdag ng 10.

Nahulog ang Lady Bla­zers sa 6-2 marka.

Umariba sina Ranya Mu­sa at Arianne Daguil pa­ra sa Benilde hawak ang pinagsamang 23 puntos subalit hindi ito sapat para dalhin ang kanilang tropa sa panalo.

Malaking butas ang 32 errors ng Lady Blazers, habang nalimitahan sa limang puntos si Season 91 Finals MVP Jeanette Panaga na karaniwan nang may average na 17 puntos kada laro.

Sa mens division, iginupo ng Benilde ang Arellano, 23-25, 25-16, 29-27, 25-20, pa­ra makuha ang solong pa­mumuno tangan ang 6-1 baraha.