Tanang kategoriya sa 10th Cebu Marathon adunay cut-off time

CEBU, Philippines – Ang ika-10 nga edisyon sa Cebu Marathon nga gikatakda karong Enero 8 diha sa Cebu Business Park dunay cut-off time bisan sa labing mubo nga distansiya sa karera.

Pito ka oras ang cut-off time nga gitakda sa full-marathon, duha ka oras sa 10K ug usa ka oras ug tunga alang sa 5K.

Kini nagpasabot nga kadtong dili makaabot sa cut-off paundangon na og dagan ug dili na palahuson pa sa finish line.

Gituyo kini sa Cebu Executive Runners’ Club ug RunRio, nga maoy nag-organisar sa maong tinuig nga lumba, aron pagseguro nga ang mga dalan nga gisira subay sa rota gikan sa Cebu Business Park dayon na ngadto sa dakbayan sa Mandaue ug Lapu-Lapu maablihan na og balik sa trapiko alas-10 sa buntag.

Sa laing bahin, ang mga race kit ipanghatag na karong Enero 4-6 gikan sa alas-10 sa buntag hangtod sa alas-9 sa gabii ug sa Enero 7 gikan sa alas-10 sa buntag hangtod sa alas-6 sa gabii. Sud niini mao ang singlet, race bib ug timing chip.

Ang mga mananaog makadawat og ganting salapi, medalya ug finisher’s shirt sa mga entrante sa 42K ug 21K, samtang ang tanang partisipante dunay pahalipay nga gisud sa loot bag. (BANAT NEWS)