Team 2 may paglaum pa
CEBU, Philippines - Buhi pa ang paglaum sa Team 2 sa finals human ilang gipukan ang ‘twice-to-beat’ Team 5 sa iskor nga 86-81 sa semifinal match sa LEAD Ballclub Christmas League 2016 niadtong Miyerkules didto sa KAI Sports Complex sa Lilo-an.
Pagsugod pa lang, nangatol na ang mga kamot ni Juneray Mendoza diin nagpauwan siya og lima ka 3-pointer nga nakatabang paglubong og 18 puntos sa Team 5. Si Mendoza maoy nangu sa mga scorers sa Team 2 pinaagi sa iyang 20 puntos, gisundan ni Kado Oliva nga mitampo og 14 puntos. Miaksiyon og gukod ang Team 5 sa pagpangulo ni commercial player Jomel Baribe sa second period, apan abtik sab nakatubag og sunod-sunod nga puntos si Arnel ‘Cdu’ Pepito, kinsa mikulit og nuybe puntos sa maong kuwarter.
Mitakilid og balik ang Team 2 dihang mikagar ang ilang mga tirada hinungdan napahakan og maayo ang ilang labaw ngadto na lang sa tres puntos. Nasuwertihan hinuon sila kay nabugnaw ang kainit sa duwa sa Team 5 ilabi na nilang Saiah ug Baribe nga wala makapasud sa unom nila ka attempts.
Ang igsuon ni Juneray nga si James Mendoza miamot og 12 puntos, samtang sila si Niño Cañete ug Jonas Bacalso nagtampohay og 10 puntos.
Nangu sa Team 5 si Baribe sa iyang 27 puntos, sila si Neil Jayme ug Saiah mitimbre’g 14 ug 10 puntos.
Puntos matag usa
TEAM 2 (86) – Ju. Mendoza 20, Oliva 14, Ja. Mendoza 12, Cañete 10, Bacalso 10, Cdu Pepito 9, Manto 4, Jeres 3, Baby James 3, Pilapil 2, Hudar 2, Balingit 2.
TEAM 5 (81) – Baribe 27, Jayme 14, Saiah 10, Cañete 9, Ritchie 8, Alvin 4, Edwin 2, Cuering 2. (BANAT NEWS)
- Latest
