Payton salig nga adunay Pinoy nga moduwa sa NBA

CEBU, Philippines - Hugot ang pagtuo ni NBA legend Gary Payton nga moabot ra ang panahon nga adunay Pinoy nga moduwa sa NBA.

Ang nine-time All-Star ug one-time NBA champion nga si Payton  nibisita  sa Sugbo  atol sa pagbukas sa NBA Store diha sa Ayala Center Cebu. Ang maong branch sa NBA Store maoy labing una sa gawas sa Metro Manila.

Sa iyang pakighinabi ning tigbalita, ang 6-foot-4 nga si Payton midayeg sa init nga pag-abi-abi kaniya sa mga Filipino fans nga grabe og pagmahal  sa basketbol.

Sa pagsikat karon ni Fil-American Jordan Clarkson  nga sinaligan sa Los Angeles Lakers, si Payton miingon nga dili madugay  aduna na unya’y homegrown Pinoy basketball players nga makapakita sa ilang katakus sa NBA.

Si Payton, usa sa  mga labing ngilngig nga point guards sa NBA diin miduwa siya uban sa Seattle Supersonics, Milwaukee Bucks, Los Angeles Lakers, Boston Celtics ug Miami Heat, dili  motuo nga maglisud ang Pinoy players sa NBA tungod sa kakuwang sa height. (BANAT NEWS)