Team Mandaue migilak sa MVP badminton
CEBU, Philippines - Ang Team Mandaue mikabkab og duha ka gold, duha ka silver ug tulo ka bronze medals sa 2016 MVP National Juniors Badminton Championships “Battle of Champions” niadtong Domingo didto sa Limketkai sa Cagayan de Oro City.
Ang Mandaue, nga gilangkuban og mga magduduwa gikan sa Banilad Shuttlers ubos ni coach Eddie Estoconeng, naka-gold kortesiya nilang Karyll Rio, Lyrden Laborte ug Zinah Marichelle Bejasa.
Si Rio maoy nanghawod sa girls under-13 human iyang gibuntog ang pambato sa Luzon nga si Nicolette Gonzalez, 20-22, 21-15, 21-16.
Samtang sila si Laborte ug Bejasa maoy nanghawod sa under-15 mixed doubles. Si Laborte naka-silver sab sa under-15 boys singles, ingon man silang Bejasa ug Rio sa girls under-15 doubles.
Ang mga bronseng medalya gitunol nilang Carl Bernard Bejasa sa boys under-17 singles, Kurt Angelo Cuabo sa under-11 ug Allen Penute ug Shandy Kyle Segundine sa under-15 boys doubles. (BANAT NEWS)
- Latest
