Duha ka Omega boxers tuyo mosakmit og korona
CEBU, Philippines - Naglaraw ang duha ka boksidor sa Omega Boxing Gym nga mosakmit og rehiyonal nga korona, apan lisud nga tahas ang ilang sagubangon gumikan kay adto man sila mangindahay sa teritoryo sa ilang kontra.
Si Jerry Castroverde tua na karon sa Russia aron harungon ang wa’y pildeng si Shavkat Rakhimov alang sa bakanteng WBO Youth Intercontinental super featherweight title karong Nobiyembre 18 (Nobiyembre 19 oras dinhi sa Pilipinas) didto sa DIVS sa Ekaterinbrug, Russia.
Samtang sa susamang adlaw, si Salatiel Amit makigpinaksitay ni Jonathan Taconing alang sa WBC Silver International light flyweight title didto sa Elorde Sports Complex sa dakbayan sa Parañaque.
Masaligon si Castroverde (9-3, 5KOs) sa iyang tsansa, apan dili lalim nga misyon ang suwayan niyang kab-uton gumikan kay iyang banggaon usa man sa labing tadhan nga boksidor sa Russia.
Sama ni Castroverde, biya sab si Amit (9-1-2, 7KOs) batok sa beteranong si Taconing (22-3-1, 18 KOs). Iyang gilantaw kining maong away isip oportunidad aron mohimo og pangan sa iyang kaugalingon.
Sila si Castroverde ug Amit parehong gi-promote sa Omega Pro Sports International (OPSI), kansang sunod nga dalit nga mao ang “Who’s Next? 3” pagabidahan ni Jhack Tepora batok ni Galih Susanto sa Indonesia alang sa WBO Oriental junior featherweight title karong Disyembre 2 diha sa Mandaue City Cultural and Sports Complex. (BANAT NEWS)
- Latest
