Free throw ni Tiongzon mipadaog sa Galvasteel

CEBU, Philippines - Si Bobong Tiongzon mitusak og krusyal nga free throw nga maoy mipadaog sa Union Galvasteel batok sa Val team, 71-70 sa 6th Conference J/J Surplus basketball tournament niadtong Sabado didto sa Talit’s Garden sa Tayud, Lilo-an.

Gawas nga maoy nakapadaog, si Tiongzon sab ang topscorer sa Union Galvasteel nga mikamada og 20 puntos.

Mosangko unta sa overtime  ang duwa  human magtabla ang iskor, 70-all sa nahabiling dos segundos, apan si Tiongzon nakakubit og foul nga mihatod kaniya ngadto sa free throw line. Napasud niya ang usa ka mahinungdanong free throw   nga mihingpit sa kadaugan.

Ang ikaduhang topscorer sa Union Galvasteel mao si Jayme Gellacone sa iyang 15 puntos ug gisundan ni Lito Dejarme nga adunay 11 puntos.

Si Arisdel miburak sab og 20 puntos aron pangulohan ang Val team nga naleksiyon human sa ilang kapildihan. Si Paul Retuya miantog og 16 puntos, samtang si Jun Tajanlangit miambit og 12 puntos.

Sa lain pang duwa, ang El Kapitan yano kaayong midaog pinaagi sa paglubong sa YUFO, 72-58.

Si Jerome Lauron maoy berdugo sa maong kadaugan nga mikabkab og 17 puntos, gisundan ni  E.J. Abraham sa iyang 13 puntos ug J. Achumbre nga adunay 10 puntos.

Ang YUFO gipangulohan ni A. Polosan pinaagi sa iyang 20 puntos ug Sardo Moreno nga mikubkob og 11 puntos.

Midaog sab ang Blizzard batok sa Northern Energy, 84-73 ubos sa pagpangulo nilang Jay-R Bucatan ug Rommel Bucatan nga mipabuhagay og 35 ug 28 puntos.

Si Alboleras miani og 31 puntos, samtang si Tiongzon mipupo og 24 aron mangu sa  wa’y daog-daog nga  Northern Energy.

Ang liga nga nahimo  ubos sa pagtugot sa ilang presidente nga si  Henry Agbon, kinsa mao sab ang tag-iya sa J/J Surplus team, gidumala ni  Fury Trazona inabagan nilang Chang Tejero, Joper Inahid ug Choy Pilapil.

Puntos matag usa

Unang duwa:

GALVASTEEL (71) – Tiongzon 20, Gellacone 15, Dejarme 11, Capin 6, Ravanna 5, Mantos 5, Labustros 2, Flores 2.

VAL Team (70) – Arisdel 20, Retuya 16, Tajanlangit 12, L.A. 11, Tuico 8, Cortez 3.

Ikaduhang duwa:

EL KAPITAN       (72) – J. Lauron 17, Abraham 13, J. Achumbre 10, N. Lauron 8, Jumamoy 6, Pepito 6, M. Salibongcogon 5, W. Salibongcogon 3, Quimbo 2.

YUFO (58) – Posolan 20, Moreno 11, J. Pon 9, Cuyos 4, Estole 2,  Normandia 2, T. Puga 2, Jugalbot 2, Capangpangan

2, Dela Cerna 2.

Ikatulong duwa:

BLIZZARD (84) – D. Bucatan 35, R. Bucatan 28,  R. Judilla 8, Judilla 7, Villagar 6.

NORTHERN Energy (73) – Alboleros 31, Tiongzon 24, Notarion 8, Acabo 5, Tagalog 6. (BANAT NEWS)