Ronnie Nathanielsz mipanaw na
CEBU, Philippines - Ang beteranong sportswriter ug analyst nga si Ronnie Nathanielsz mipanaw sa laing kalibotan kagahapon sa buntag didto sa usa ka tambalanan sa California. Nag-edad siya og 81-anyos.
Si Nathanielsz miadto sa Amerika isip kabahin sa broadcast panel nga mokober unta sa sangka nilang Manny Pacquiao ug Jessie Vargas sa miaging semana, apan gidala siya sa ospital kay giataki sa kasingkasing samtang nagbiyahi padung sa Las Vegas alang sa maong away. Nalandig siya sa Mills-Peninsula Medical Centers sa Burlingame, California sukad niadtong Nobiyembre 3.
Si Nathanielsz usa ka prominente apan kontrobersiyal sab nga personalidad sa sports media. Gawas sa basketball ug football, wala sab siya’y puas nga nagsulat og mga balita kabahin sa boksing, madagku man o gamay nga promosyon timaan sa dili hitupngan niyang dedikasyon sa buhat nga labing duol sa iyang dughan.
Natawo siya sa Sri Lanka, apan mibalhin sa Pilipinas niadtong 1962. Nahatagan siya og Filipino citizenship pinaagi sa naturalization sa panahon ni kanhi presidente Ferdinand Marcos niadtong 1973.
Suod nga higala ni boxing legend Gabriel ‘Flash’ Elorde, si Nathanielsz nahimo sab nga liaison officer ni Muhammad Ali atol sa makasaysayanong sangka nila ni Joe Frazier nga giulohan og “Thrilla in Manila” niadtong 1975.
Sa iyang pagpanaw, nawad-an og usa ka lig-on haligi ang Philippine sports. (BANAT NEWS)
- Latest
