Convergys, Lexmark sa E-League finals

CEBU, Philippines - Human mahagba sa pasiunang duwa, gikumpleto sa defending champion Convergys Converters ug Lexmark Stallions ang madasigon nilang pagbangon aron pagtapos sa tagsa-tagsa nila ka mga kontra ug ingon man pag-angkon og katungod nga maoy mag-abot sa kampiyonato sa Elite Classic sa 12th CSCC E-League men’s basketball tournament niadtong Domingo didto sa City Sports Club-Cebu gym.

Si Franz Dysam miposa og 21 puntos uban ang tulo ka rebounds,   sa Convergys nga mipahayag sa ilang kampanya pagdepensa sa ilang titulo human gipalagpot ang Accenture Sharks, 62-56, samtang si Siegfred Ofonda maoy nangu sa lima ka players nga naka-double figures uban sa iyang 16 puntos sa Stallions nga mipanso sa laing tiket sa finals human gitagak ang Teleperformance All-Stars, 72-69. Mitampo si Kenneth Dysam og 13 puntos, samtang si Jaime Pacquiao mipuntos og 10 ug unom ka rebounds sa Converters nga milusad og  23-11 rally sa ikaduhang kuwarter aron pagposte og 34-20 nga bentaha sa halftime. Wala na nila lugaki pa ang ilang depensa aron pagpabakwit sa Sharks.

Sa laing duwa, si Franco Angelo Cipriano midonar og 13 puntos, pito ka rebounds, si Michael Recla mitali og 11 samtang sila si Sylvester Millevo ug Vill Duero mikadlit og 10 puntos matag usa alang sa Stallions nga  salida og maayo sa naghinapos nga bahin sa duwa aron pagpakgang sa All-Stars.

Ang Convergys ug ang Lexmark magsugod sa ilang  best-of-three title series karong Nobiyembre 12, susamang adlaw diin ang Supportsave Dragons ug Mahindra Tech Mighties mosikad sab sa kaugalingon nilang serye alang sa korona sa Evo League.  (BANAT NEWS)