Champion Senator: Pacquiao mibihag ni Vargas aron pagkulit og laing kasaysayan

CEBU, Philippines - Nahimong mabungahon ug makahulogan ang pagbalik og away ni Pinoy ring star Manny Pacquiao human iyang gipilde si Jessie Vargas pinaagi sa unanimous decision aron pagsakmit sa WBO welterweight title kagahapong adlawa atubangan sa 16, 132 ka fans nga nagdasok didto sa Thomas & Mack Center sa Las Vegas, Nevada.

Gawas nga nahimong WBO welterweight title-holder sa ikatulong higayon, ang bugtong eight-division world champion mikadlit sab og laing kasaysayan isip labing unang world boxing champion nga usa ka aktibong senador.

Ang 37-anyos nga si Pacquiao milusad og usa ka inutok nga away nga napuno sa taktika hinungdan nga wala kaugpo kaniya ang mas taas, mas lapad ug mas dako nga si Vargas.

Sa ikaduhang hugna, si Pacquiao mipataop og solidong tuo nga suntok nga maoy nakapahagba ni Vargas. Nakabangon ra hinoon dayon ang nauwahi ug mipakita og igong kadasig aron paglahutay sa 12 ka hugna nga engkuwentro.

"I feel happy," matud pa ni Pacquiao sigun sa taho sa Agence France Presse. "I'm trying every round to knock him down but also not be careless."

Si Pacquiao, nga nagbitbit na karon og 59-6-2 record uban ang 38KOs, miwadwad og dekalidad nga away agig pagpakita nga aduna pa siyay ikabuga ning puntoha sa iyang karera apan pakyas siya pag-iskor og knockout nga idlas kaayo sa iyang mga kamot sud sa pito na ka tuig.

Bisan pa man niini, mihimo gihapon siya og impresyon sa way pagbahar niyang inawayan diin makita gihapon ang iyang kapaspas, kaabtik ug kusog. Ang duha ka judges parehong mitali og 118-109 samtang ang laing usa sikit nga mi-iskor og 114-113 pabor hinoon gihapon sa Pinoy'ng senador.

Si Pacquiao unang nahimo nga WBO welterweight champion niadtong 2010 human gipakatug si Miguel Cotto. Giilog kini kaniya ni Tim Bradley duha ka tuig ang milabay apan nabira ra sab niya og balik human giihaw si     Bradley sa ilang rematch niadtong tuig 2004.

Nahuboan siya og balik sa iyang bakos human gipilde sa retirado nang si Floyd Mayweather, nga didto sa ringside mitan-aw sa ilang sangka ni Vargas. Nasayod hinoon si Pacman sa presensiya ni Mayweather kay siya pa gani mismo ang miimbita niini.

"Yes I invited him to come tonight," matud pa ni Pacquiao. Wala hinoon siya mohatag og konkretong tubag kun interesado ba siya nga makig-rematch sa iyang karibal. "We will see," maoy mubo niyang tubag.

Taliwala sa naglagiting niyang kalampusan, dunay butang nga napamatud-an si Pacquiao ilabi na sa iyang mga kritiko - puyde niyang dunganon ang iyang karera isip boksingero ug pulitiko.

Sa iyang bahin, mapaubsanong gidawat ni Vargas ang iyang kapildihan dala ang pagsabwag og pulong nga pagtahud ngadto sa abilid ni Pacquiao ilabi na ang kaabtik niini.

"Fighting Manny Pacquiao is like playing a very fast game of chess," dason pa ni Vargas. "You have to be alert at all times. He was very fast but I was able to get in a few counters."

Si Vargas garantisado nga modawat og $2.7 million, apan wa pay klaro kun pila ang bahin ni Pacquiao gumikan kay mag-agad lamang siya sa porsiyento sa makita sa maong away ilabi na sa halin unya sa pay-per-view.  (BANAT NEWS)