Sharks mitagak sa Pioneers sa E-League
CEBU, Philippines - Si Archie Brian Batua mitali og 16 puntos uban ang 10 ka rebounds ug tulo ka assists sa dihang gipalagpot sa Accenture Sharks ang Sykes Pioneers, 61-53 sa Elite Classic sa 12th CSCC E-League men’s basketball tournament didto sa City Sports Club-Cebu gym.
Si Marloni Gonzales midugang og 12 puntos, lima ka rebounds ug duha ka steals, samtang si Junas Marion Misa miamot og 10 puntos, tulo ka rebounds, tulo ka assists ug duha ka steals sa Sharks nga milusad og nagkayong opensa sa second half aron sa pagpatikangkang sa Sykes.
Alkanse og siyete puntos sa halftime, 24-31, ang Sharks mi-rally sa ikatulong kuwarter, 22-14 ug dayon gitak-op ang duwa pinaagi sa 15-8 run aron pag-abante sa sunod nga hugna sa torneyo.
Sa Evo League, ang Contact Solutions Flying Lemurs, Dyninno Raptors ug Teleperformance All-Stars mipukan sa twice-to-beat nilang kontra aron pag-angkon og laing kinabuhi.
Si Jerard de la Cerna mipabuto og 35 puntos alang sa Flying Lemurs nga mipakurat sa QBE Generals sa iskor nga 86-76, sila si Ron Mabanto ug Rainier Dominic Obenza nagkumboya og 35 puntos aron pag-aswat sa Raptors ngadto sa 68-52 nga kadaugan sa Kyocera Frontiers, samtang si Dean Junber Escalon miratsada og 21 puntos uban ang tulo ka rebounds ug duha ka assists alang sa All-Stars nga mipakgang sa ePerformax Reds, 70-55. (BANAT NEWS)
- Latest
