Convergys, Lexmark abante sa E-League
CEBU, Philippines - Ang twice-to-beat defending champion Convergys Converters ug Lexmark Stallions mitagak sa ilang mga kontra aron pag-abante sa sunod nga hugna sa Elite Classic sa 12th CSCC E-League men's basketball tounament niadtong Sabado didto sa City Sports Club-Cebu gym.
Si Franz Dysam mikadlit ogt 16 puntos, unom ka assists ug tulo ka rebounds alang sa Converters nga mitapos sa season sa Telstra Boomerangs, 79-63, samtang si Sylvester Millevo miratsada og 26 puntos, walo ka rebounds, tulo ka assists ug duha ka steals sa Stallions nga misiak sa Wipro Tigers, 71-67.
Miamot si Lourenz Limpangog og 14 puntos ug lima ka rebounds, samtang si Kenneth Dysam midugang og 13 puntos ug lima ka rebounds alang sa Converters, nga mipabuto og 26-11 nga bomba sa ikaduhang kuwarter aron pagbuak sa duwa atol sa halftime, 44-27.
Samtang si Jan Oneil Sahilan midonar og 11 puntos, lima ka steals ug upat ka assists sa Stallions nga maoy mikontrolar sa duwa human sayong nakalabaw, 20-16.
Sa Evo League, ang Supportsave Dragons ug Tech Mahindra Tech Mighties mipalagpot sab sa ilang mga karibal.
Si Germaine Jo Guarsisma mipatuasik og 24 puntos uban ang walo ka rebounds, upat ka steals ug tulo ka assist sa Dragons nga mipalayas sa Author Solutions, Inc. Hardbacks, 71-53, samtang si EJ Saavedra dunay 15 puntos ug sila si Kenneth Yodj Garcia ug Robert Rebaño mitala og 11 puntos matag usa alang sa Tech Mighties nga mipasibat sa The Results Spartans, 68-64. EBV (BANAT NEWS)
- Latest
